維基百科，自由嘅百科全書

嶺南大學，係廣州度一個已經消失咗嘅大學，原先喺1888年創校，係不隸屬於任何教派嘅基督教大學，係中華民國陣嘅13個基督教大學之一。學科最初係有英文、格致、理化、算術、地理、生物等西學課程，由1927年開始，原有文理學科外，開辦咗農、商、工、醫等學院。經過十年左右發展，成為咗中國大陸南方一個舉足輕重嘅私立大學。史堅如、陳毅、廖承志、冼星海、鄒至莊、曹安邦、陳香梅、姜伯駒等都係呢間學校出來嘅學生，喺全球各地設有同學會、校友會17個。 據宴文士校長喺1912年嘅報告，辦呢間學校不單止係為咗華人教育同總體福祉，更係要將基督教嘅精神，展示俾啲學友同學校嘅贊助人。經學校同董事會嘅努力，1920年嘅第一屆嶺南本科畢業生，可以直接北美十間名校嘅研究生部進修，令嶺南聲望大增。到1927年廣州嶺南正名做咗大學，時任校長鍾榮光博士俾稱之為「嶺南之父」。同年向國民政府呈請立案，俾當局確定係私立基督教大學，而俾納入